Карэспандэнт
моладзевай рэдакцыі “РГ” пабывала на фабрыцы і даведалася, чым адрозніваецца
туалетная вада ад адэкалону.
Мабыць, усе бачылі адэкалоны "Саша",
"Шыпр","Трайны", якія мае на сваёй паліцы амаль кожны
бацька альбо дзядуля. Але мала хто ведае, што робяцца яны ў Маладзечне. І я
была не ў курсе, пакуль не патрапіла на экскурсію на прадпрыемства.
Яшчэ метраў за пяцьдзясят, не дайшоўшы да брамы, мы
пачулі прыемны пах. Але ў памяшканні,
дзе ствараюцца духі, водар быў такі насычаны, нават рэзкі, што хутка
пачынала кружыцца галава. Гэта таму, што канцэнтрацыя араматызатараў вельмі
высокая.
- Вы, мусіць, чуеце гэты пах. А
мы ўжо да яго прывыклі, - адзначыла наш “экскурсавод”, начальнік цэху Людміла Жыхарава.
Жанчына расказала, што кампанія існуе ўжо 20 гадоў. Галоўныя інгрэдыенты
для парфумы прывозяцца з самой Францыі. Шмат знакамітых парфумерных брэндаў выкарыстоўваюць
такія ж самыя араматызатары. Прадукцыя прадпрыемства прызначана для простых
людзей, таму і кошт яе даступны. Але склад парфумы не адрозніваецца ад дарагой
французскай.
Як атрымліваюцца духі?
У цэху ёсць вялізны чан, рэактар, куды зліваюцца ў патрэбных прапорцыях
эцілавы спірт, парфумерная кампазіцыя, вада і, калі трэба, фарбавальнік. Усё
гэта змешваецца, фільтруецца, а потым – выпампоўваецца ў вялізныя пластыкавыя
бочкі. Для мяне вельмі незвычайна было бачыць духі ў ёмістасцях па 1000 літраў,
бо мы прывыклі да прыгожых мініяцюрных бутэлечак.
Але разліваць парфуму яшчэ рана – яна павінна адстаяцца. Духі стаяць
месяц, туалетная вада – 2 тыдні, а для адэкалона хапае і сямі дзён. Увесь гэты
час ідзе фарміраванне паху, і лепш, каб умовы былі халаднаватыя. А што адбудзецца,
калі духі не будуць адстойвацца? Тады выпадзе асадак. Таму, калі купляеш парфуму
“падазронага” паходжання, у бутэлечцы можа пайсці “снег” – прыкмета таго, што
ваду рабілі непрафесіяналы.
Пасля адстойвання ідзе фільтрацыя, і толькі затым пачынаецца разліў.
Для гэтага ёсць спецыяльная тэхніка: шкляныя флаконы самай рознай формы хутка
напаўняюцца і аўтаматычна закручваюцца прыгожай накрыўкай. Урэшце, поўныя
бутэлечкі ідуць на доўгі стол, за якім сядзяць шмат дзяўчат і якія з хуткасцю
вавёрак пакуюць духі ў рознакаляровыя каробачкі. Прычым, упакоўкі яны складваюць
самі - сапраўдны “hand made”!
Упершыню я пачула, што існуе
сусветная класіфікацыя духоў. Кожны арамат мае свой асабісты нумар, а
касметычныя фірмы вырабляюць версіі духоў па той жа рэцэптуры, якую купляюць у Францыі.
Усё таму, што рэцэпты араматызатараў захоўваюцца ў строгім сакрэце.
- Не трэба выліваць на сябе
паўбутэлькі духоў, каб прыемна пахнуць. Дастаткова адной кропелькі, каб іншыя
маглі адчуваць тонкі шлейф, які вы пакідаеце за сабой, – раіць Людміла
Жыхарава. - Кожны чалавек мае свой пах, і парфума змешваецца з ім. Таму адныя і
тыя ж духі могуць па-рознаму пахнуць на розных людзях.
Ёсць
пытанне.
Вы можаце спытацца, чым адрозніваюцца адэкалон, духі, парфумерная вада
і туалетная вада. Для адэкалона (Eau de Cologne) не вельмі дарагі спірт
разбаўляецца вадой і араматызатарам. Туалетная вада (Eau de Toilette) - лепшы спірт, троху вады і французскі араматызатар. Кошт яе залежыць ад
канцэнтрацыі пахучых рэчываў: чым іх болей – тым даражэй.Таму бывае вада як і
за 30 тысяч рублёў, так і за мільён. Парфумерная вада (Eau de Parfum) па сваёй стойкасці стаіць паміж туалетнай вадой і духамі (Parfum) - самым каштоўным відам, з найвялікшай канцэнтрацыяй араматызатараў. Але стойкасць таксама залежыць не
толькі ад працэнтаў кампазіцыі, але і ад самога тыпу арамату.
Комментариев нет:
Отправить комментарий